पाल्पाको रम्भा गाउँपालिका वडा नम्बर २ मा पहिरोले घर पुरिँदा एक जनाको मृत्यु भएको छ भने पाँच जना बेपत्ता भएका छन् ।

सो वडाको सुरुङडाँडामा पहिरोले घर पुरिएर २७ वर्षीय मोतिसरा गाहाको मृत्यु भएको हो भने फोक्सिङकोटका हुम्मबहादुर गाहाको घर पुरिँदा ५ जना बेपत्ता भएका हुन् ।

मृत्यु भएकी मोतिसरा ८ महिनाकी गर्भवती रहेकी जनाइएको छ । पहिरोमा परेका छोरा, छोरी र भान्जी गरी ३ जनाको उद्धार गरिएको जिल्ला प्रहरी कार्यालय पाल्पाले जानकारी दिएको छ ।

उता फोक्सिङकोटमा घरधनि हुम्मबहादुरसहित उनकी श्रीमत धनिसरा, छोरी कृष्णमाया, नातिनीहरु खुविसरा र लक्ष्मी आले बेपत्ता भएको प्रहरीले जनाएको छ ।

जिल्ला प्रहरी कार्यालय पाल्पाका डीएसपी मदन गिरीले पहिरोले बगाएर बेपत्ता भएका सबैको खोजी भइरहेको जानकारी दिए ।