एजेन्सी – भारतीय अभिनेत्री काजल अग्रवालको विवाह आज हुने भएको छ । अक्टोबर ३० अर्थात आज आफ्ना प्रेमी गौतम किचलुसँग सातफेरो लिँन लागेको उनले सामाजिक सञ्जालमार्फत जानकारी दिएकी हुन् ।

आफ्ना विवाहका विभिन्न कार्यक्रमको तस्बिर सामाजिक सञ्चालमा सेयर गर्दै उनले आफू यतिबेला विवाहका विभिन्न काममा व्यस्त रहेको जानकारी दिएकी छिन् ।

आफ्नो इन्स्टाग्राम अकाउन्टमा आफ्नो विवाहको विषयलाई लिएर तस्बिर सेयर गर्दै उनले आफूलाई यो कुरा सेयर गर्न पाउँदा निकै खुसी लागेको बताएकी छन् ।

‘मलाई यो कुरा सेयर गर्न पाउँदा निकै खुसी लागेको छ । म र गौतम किचलु यही अक्टोबर ३० मा मुम्बईमा रहेको हाम्रो परिवारको जमघटकाबीच विवाह गर्दैछौँ’, काजलले विवाहको बारेमा लेखेकी छिन् ।

गौतम इन्टेरियर डिजाइनर हुन् । उनको अनलाइन स्टोर छ ।

३५ वर्षीया काजलले हिन्दी फिल्म ‘क्यों हो गया न’ बाट डेब्यु गरेकी थिइन् । जसमा उनको निकै सानो भूमिका थियो ।

सन् २००७ मा पहिलो तेलुगू फिल्म ‘लक्ष्मी कल्याणम’ मा देखिएकी थिइन् । तर त्यसै वर्ष रिलीज भएको फिल्म ‘चंदामामा’ बाट उनले पहिचान पाइन् ।

सन् २००९ मा आएको तेलुगू फिल्म ‘मगधीरा’ ले उनको करियरलाई उचाईमा पुर्याइदियो । उनले सन् २०११ मा ‘सिंघम’ मा समेत अभिनय गरेकी छिन् ।