सत्तारूढ दल नेकपा कम्युनिष्ट पार्टी (नेकपा) की सचेतक शान्ता चौधरी कोरोना संक्रमण मुक्त भएकी छन् । बीर अस्पतालमा १९ दिनको उपचारपछि उनी संक्रमण मुक्त भएकी हुन् । आफू पहिले देखिका गम्भीर रोगहरुको कारणले निकै डर लागेको भएपनि कारोना जितेकोमा पुनर्जीवन पाएको महसुस गरेको उनको भनाई छ ।
सामाजिक सञ्जाल फेसबुकमा स्टाटस लेख्दै उनले अधिकांश समय आइसियूमा छटपटिदा पीडा भएपनि अहिले रिपोर्ट आएको जानकारी दएकी छन् । ‘पहिले देखिका गम्भीर रोगहरुको कारणले पनि कोरोनाले मलाई यसरी गलाएको हुनुपर्छ। पुराना रोग हुनेहरुलाई बचाउन गाह्रो पर्छ भन्ने सुनिरहेकोले पनि बाँच्छु जस्तै लागेको थिएन’, उनी लेख्छिन्, ‘यसको अनुभव कुनै दिन सार्वजनिक गर्ने नै छु। आज कोरोना निगेटिभ भएको नतिजा आयो। लाग्यो मैले पुनर्जीवन पाएँ।’
कोरोना संत्रमणमुक्त भएपनि अस्पतालमै बाफ लिंदा तातो पानीले खुट्टा पोलेर घाउ बनेका कारण उनी अस्पतालबाट डिस्चार्ज भने भएकी छैनन् । ‘त्यसैले कोरोनामुक्त भएपनि आफ्नै नित्य दैनिकीमा फर्कन मलाई समय लाग्नेछ’, उनले लेखेकी छन् ।
चौधरीले आफूलाई मृत्यूको मुखबाट बाहिर निकालेर मलाई पुनर्जीवन दिने वीर अस्पत्तालका सबै डाक्टरहरू, अहोरात्र खटिने नर्सहरू र अस्पत्ताल परिवार प्रति कृतज्ञता व्यक्त गरेकी छन् । त्यस्तै पार्टीका नेता कार्यकर्ता, समर्थक, शुभचिन्तक र नातागोताहरूलाई पनि धन्यवाद दिएकी छन् ।
उनले अस्पतालबाटै विजया दशमीको शुभकामना दिँदै सबैमा यो कोरोनारुपी महाशत्रुमाथि विजय प्राप्त गर्न शक्ति मिलोस् भन्ने कामना गरेकी छन् । ‘कसैका परिवार पनि यो समयमा अस्पत्ताल बस्नु नपरोस्। अस्पत्ताल खोज्दै हिड्नु नपरोस्’, उनले लेखेकी छन् ।
सचेतक चाैधरीले लेखेकाे स्टाटस जस्ताकाे तस्तै
आभार
~~~~~~~~~
जोगिने कति नै कोशिस गर्दा पनि आखिर कोरोनाले आक्रमण गरिछाड्यो। पुरै १९ दिनको अस्पत्ताल बसाइ र त्यसमा पनि अधिकांश समय आइसियूमा छट्पटिनु पर्दाको पीडा वर्णन गर्न सकिंदैन। पहिले देखिका गम्भीर रोगहरुको कारणले पनि कोरोनाले मलाई यसरी गलाएको हुनुपर्छ। पुराना रोग हुनेहरुलाई बचाउन गाह्रो पर्छ भन्ने सुनिरहेकोले पनि बाँच्छु जस्तै लागेको थिएन। यसको अनुभव कुनै दिन सार्वजनिक गर्ने नै छु। आज कोरोना निगेटिभ भएको नतिजा आयो। लाग्यो मैले पुनर्जीवन पाएँ।
वीर अस्पत्तालका अति सघन उपचार कक्षको बेडमा बडो मुश्किलले सास फेरिरहँदा आफूलाई एकदम निरीह महसूस गर्थे। बाहिर हजारौं शुभचिन्तकहरू हुनुहुन्थ्यो जसले मेरो शीघ्र स्वास्थ्य लाभको कामना गरिरहनु भएको र मेरो स्वास्थ्यको चिन्ता गर्दै आवश्यक समन्वयका र सहजीकरणका लागि प्रयत्न गरिरहनु भएको थियो। तर म हजारौ शुभचिन्तकहरूको भीडमा एक्लो एक्लो महसूस गर्थें। यस्तो अनुभव अधिकांश कोरोना संक्रमितले गर्नुभएकै हुनुपर्छ।
अझै म डिस्चार्ज भएकी छैन। यसैबिचमा बाफ लिंदा तातो पानीले खुट्टा पोलेर अर्को असह्य पीडा थपिएको छ। त्यसैले कोरोनामुक्त भएपनि आफ्नै नित्य दैनिकीमा फर्कन मलाई समय लाग्नेछ।
मैले लाखलाख धन्यवाद दिनुपर्ने पार्टीका श्रध्देय कामरेडहरू हुनुहुन्छ। मेरा समर्थक, शुभचिन्तक र नातागोताहरू हुनुहुन्छ। उहाँहरूलाई अहिले एकमुष्ट धन्यवाद दिन्छु। वीर अस्पत्तालका सबै डाक्टरहरू, मेरो सेवामा अहोरात्र खटिने नर्सहरू र समस्त अस्पत्ताल परिवार प्रति म कृतज्ञ छु। उहाँहरुले मृत्यूको मुखबाट बाहिर निकालेर मलाई पुनर्जीवन दिनुभो। बेलाबेलामा हौसला दिइरहनु भयो। विशेष विशेष हेरचाह गर्नु भयो र आज म यो स्टाटस लेख्ने अवस्थामा फर्कें। उहाँहरूका लागि मेरा शब्दका धन्यवाद अपुरो होला।
अन्तमाः सबै सबैमा धेरै आधार व्यक्त गर्न चाहन्छु। अस्पत्तालबाट विदा हुँदाको दिन फेरि लेखुँला। विजया दशमीको सबैमा शुभकामना दिन चाहन्छु। कसैका परिवार पनि यो समयमा अस्पत्ताल बस्नु नपरोस्। अस्पत्ताल खोज्दै हिड्नु नपरोस्। हामी सबैमा यो कोरोनारुपी महाशत्रुमाथि विजय प्राप्त गर्न शक्ति मिलोस्। धन्यवाद।
प्रतिक्रिया दिनुहोस्